O 30 de novembro de 2022 tivo lugar a preestrea da curta “Os Vestixios do Reino Medieval de Galicia na Catedral de Santiago de Compostela“ na Sala NUMAX. A preestrea contou coa presenza da guionista e directora Rosa Taboada, a actriz Melania Cruz e a Investigadora e Catedrática de Arte na Facultade de Hª da U.S.C. Rocío Sánchez Ameijeiras.
Ao igual que no afamado documental de Werner Herzog “A cova dos soños esquecidos”, a curtametraxe pretende describir en primeira persoa as sensacións interiores que se experimentan ao entrar por primeira vez pola noite nos espazos da Catedral (a nave central, a Cripta, o Panteón Real e o Pórtico da Gloria), tentando atopar os vestixios do antigo Reino e, sobre todo, na descuberta e posta en valor das figuras femininas existentes no templo: virxes, profetisas, raíñas, adúlteras e mesmo seres mitolóxicos en forma de sereas cobran vida á luz das explicacións dadas pola investigadora e catedrática Rocío Sánchez Ameijeiras.